KIM KIM

Kong it Zomi sanggam u leh naau te aw,




Pasian thupha hang iin ka ta nu nihna uh Kyim Mung (En Lamh Kyim Gualnam) in Arlington High School, Riverside, pan tu kum iin High School senior (grade 12) hong zo thei aa June 11, 2009 ni tak nai 6:00-7:00 p.m. iin Ramona High School Football Stadium sung aa graduation ceremony ah ka va ki hel uh hi. Mi te adingin thupi het lo ahihhangin ka tanu ii gualzawhna ahihmanin ko a nu leh a pa te ka lungdam luat man uh leh a hong lungdampih ding Zomi sanggam u leh naau te kiang ah ka lungdamna thu hong thei sak ungh.



Riverside khua sung aa High School tampi a om lak ah Arlington High School peen a gol lua pawl ahih loh hang iin a laaihawl pawl khat ahi hi. Hih High School ah grade 9 pan 12 (Freshmen, Sophomores, Juniors, leh Seniors) tan 4 bek om hi napi 2008-2009 school year sung iin sangnaupang peen tul nih vaal bang pha uh hi. Tu kum iin High School senior 443 in graduate uh aa nop ci tak iin graduation bawl ziahziah uh hi. Pasian thupha hangin leh a kua matek in nong thungetsakna uh hangin Kyim in a nuai aa bang iin gualzawhna hong ngah hi.



1. High School senior graduating class member 443 sung pan sangnaupang 40 in Honors (3.50-3.99) tawh a lai uh zo uh aa sangnaupang 21 in High Honors (4.00 and above) tawh a zawhna ah Topa Pasian thupha hangin Kyim Kyim zongh High Honors te sung ah hong kihel ahihmanin Topa min ka phat uh hi.

2. 2008-2009 school year sung iin Arlington High School, Riverside, California, ii girls’ tennis team captain sem hi. “Kimawlna tuual ahi aa a pua lam ahizong’n etteh tak cing ahihmanin tennis coach Eric Biddle in varsity captain ding aa a tel hi” ci in reporter Caroline Cooke in Mane Thing Arlington High School, Volume XXXVI, Issue 6, Sports 29, June 5, 2009 ah gelh hi.

3. Pasian thupha hang iin Kyim in girls’ team captain a sep sung November 24, 2008 ni iin CIF-SS (California Interscholastic Federation - Southern Section) a kici Division V CIF-SS/Toyota 2008 Girls Team Tennis Championships kimawlna ah High School team 32 te a kimawlna sung pan Arlington High School, Riverside, California in Champion ngah hi. Inland Empire School District in tu maa kum 35 bang sung pan aa Champion a ngah masakna uh hi aa Arlington High School, Riverside, in Quarter Final dong nangawn a tung zo ngei lo ahihmanin Arlington High School a om zawh kum 30 sung ah AHS in CIF Champion a ngah masakna uh hi aa AHS sang ii khang tangthu sung aa akip leh a kiciamteh den ding gualzawhna lian khat ahi hi.

4. Arlington High School pan Female Athlete of the Year award kipia hi.

5. May 18, 2009 ni tak iin Riverside khuapi sung Riverside Convention Center ah induction ceremony kibawl aa Riverside City Mayor leh Council member te in Riverside District sung aa High School tuamtuam te pan tennis bek hi lo iin sport nam tuamtuam aa champion a ngah High School te gualzawh pawi bawlpih hi. Tua ni tak Riverside Sport Hall of Fame ceremony pan Athlete of The Year cih minphatna Kyim Kyim tung ah a piak ban uh ah Riverside Sport Hall of Fame special scholarship for 2009 ci in champion a ngah High School tampi te sung aa sangnaupang tampi te lak ah sangnaupang 5 bek scholarship $500.00 ta a kipiak khiatna lak ah Topa’ thupha hang iin Kyim Kyim in zongh ngah hi.

6. U.S. President Barack Obama ii President Award zongh ngah hi.

7. Arlington High School ah Choir group thuap thum a om lak ah a saang peen ahi Chamber Singer choir group sung ah a kihel ban ah Science Club, BASIC (Brothers and Sisters In Christ), Interact cih te ah zongh kihel iin mapang kawikawi hi.

8. CSF (California Scholastic Federation) ii secretary sem aa graduate 443 lak aa California Scholastic Federation Seal Bearer a ngah 29 te sung ah kihel hi.

9. Graduate 443 lak pan National Honor Society cih ciaptehna a ngah sangnaupang 22 te lak ah Kyim Kyim zongh Topa’ thupha hang iin kihel hi.



Tu kum September 2009 pan La Sierra University, Riverside, ah sang zom ding iin gelna nei hi. Kyim in pre-dent a zop kawm iin La Sierra University ah University tennis ah kimawl sawm hi. La Sierra University peen private university ahihmanin kum khat iin $34,000 bang bei thei mawk ahihmanin nawngkaina om lo iin a hong zop toh suaksuak theih nading zongh ka thungetna uh ahi hi.



Ih biak Topa Pasian thupha hang iin Kyim Kyim in cidam tak leh hoih tak iin a high school a hong zo thei ta suak ahihmanin Topa tung ah lungdam ka ko uh hi. A hong lungdampih ding Zomi laizom a kua matek tung ah ko innkuan lungdamna thu hong za sak ungh.



Zahtakna lianpi tawh Kyim Kyim’ nu leh pa,





Mungno (Gin Sian Mung Gualnam)

Maangno (Niang Go Maang Gualnam)

Riverside, California